Ümid Partiyasının sədri İqbal Ağazadə öz sosial media hesabında son günlərdə ərazi mübadiləsi ilə bağlı açılan müzakirələrə reaksiya verib.
Partiya sədrinin mövqeyini izləyicilərə təqdim edirik:
“Bugünlərdə bəzi ictimai-siyasi statuslu şəxslər ərazi mübadiləsi ilə bağlı (Zəngəzur-Mehri yolunu Xankəndi və digər rus sülhməramlılarının müvəqqəti nəzarətində olan ərazilərlə) müzakirələr açmağa cəhd edirlər.
Xatırladıram ki, bu, Azərbaycan Respublikasının Konstitusiyasının 11-ci maddəsinə ziddir, torpaqlarımızın heç bir hissəsini heç bir şəkildə kimsəyə vermək hüququmuz yoxdur.
Yalnız sərhəd dəyişdirilməsi Referenduma çıxarıla bilər ki, bunun da hüquqi təfsiri ərazi mübadiləsi deyil. Sərhəd xəttinin çəkilməsi ilə ərazi mübadiləsi fərqli hüquqi terminlərdir.
Azərbaycan torpaqları kimsənin malı deyil ki, onunla istədikləri kimi davransınlar.
Xalqın belə bir halda müqavimət hüququnu kimsə əlindən ala bilməz.
QEYD: Maddə 11. Ərazi
I. Azərbaycan Respublikasının ərazisi vahiddir, toxunulmazdır və bölünməzdir.
II. Azərbaycan Respublikasının daxili suları, Xəzər dənizinin (gölünün) Azərbaycan Respublikasına mənsub olan bölməsi, Azərbaycan Respublikasının üzərindəki hava məkanı Azərbaycan Respublikası ərazisinin tərkib hissəsidir.
III. Azərbaycan Respublikasının ərazisi özgəninkiləşdirilə bilməz. Azərbaycan Respublikası öz ərazisinin heç bir hissəsini heç bir şəkildə kimsəyə vermir; yalnız Azərbaycan Respublikası Milli Məclisinin qərarı ilə Azərbaycanın bütün əhalisi arasında Referendum keçirmək yolu ilə Azərbaycan xalqının iradəsi əsasında dövlət sərhədləri dəyişdirilə bilər.”
