Azərbaycan Ümid Partiyasının sədri İqbal Ağazadə müəllimləri təbrik edib. Təbriki izləyicilərə təqdim edirik:
Əziz müəllimlər!
Sizi Müəllimlər Günü münasibətilə təbrik edirəm!
Hər şeydən öncə hər birinizə ali nemət olan can sağlığı, firəvan həyat və uğurlu tədris illəri diləyirəm.
Arzu edirəm ki, sayənizdə övladlarımızın bilik, təhsil sahəsində atdıqları addımları xeyirli, uğurlu olsun.
Biz hər birimiz – bütöv xalq olaraq, dövlət olaraq, təhsil sisteminə xüsusi diqqət ayırmalı, sizin əməyinizin layiqincə dəyərləndirilməsinə yüksək diqqət və qayğı ilə yanaşmalıyıq. Çünki elm, təhsil hər bir xalqın, millətin bünövrəsi, inkişaf meyarıdır. Ona görə də gələcəyimizin daha parlaq olması üçün təhsil sahəsinə daha çox diqqət ayırmalıyıq.
Əziz müəllimlər!
Bundan öncəki illər arzu edirdik ki, Qarabağımızda təhsil ocaqları açılsın.
Budur, bu gün artıq iğaldan azad etdiyimiz Xankəndimizdə təhsil ocağı açılıb.
Biz Qarabağımızda bu istiqamətdə daha məsuliyyətlə çalışmalıyıq ki, o torpaqları azad edən Şəhidlərimizin müqəddəs ruhu şad olsun!
Torpaqlarımızın azad edilməsində canından keçən Şəhid müəllimlərimizin ruhu qarşısında baş əyir, müəllim qazilərimizə can sağlığı arzu edir, yaralılarımıza şəfa diləyirik!
Dəyərli müəllimlər!
Unutmayaq ki, məhz sizin zəhmətiniz sayəsində şagirdlər, tələbələr ölkəmizin gələcəyidir.
Bir daha sizi təbrik edir, uğurlar arzulayıram!
Sevgi və sayğılarla İqbal Ağa-zadə
Şərh yaz
