Bu gün dünya şöhrətli alim, texnika elmləri doktoru, professor, Azərbaycan Milli Elmlər Akademiyasının müxbir üzvü Rafiq Əliyevin 80 illik yubileyidir.
Rafiq Əliyev 10 fevral 1942-ci ildə Ağdam rayonunun Novruzlu kəndində anadan olub.
Azərbaycan Dövlət Neft Akademiyasının “Avtomatlaşdırılmış idarəetmə sistemləri” kafedrasının yaradıcısı və uzun müddət müdiri olub. Azərbaycan Dövlət Neft Akademiyası və Corciya Dövlət Universitetinin (Atlanta, ABŞ) MBA və BBA proqramlarının direktorudur.
“Zadə irsi və süni intellekt” Assosiasiyasının prezidentidir.
Azərbaycan, Rusiya, Almaniya, ABŞ, İran və başqa ölkələrdə 160-dan çox elmlər namizədi, 35 elmlər doktoru hazırlayan Rafiq Əliyevin dünyanın ayrı-ayrı ölkələrində çap olunmuş kitabları Almaniyanın Zigen və Darmştadt, ABŞ-ın Boston və Kaliforniyadakı Berkeley, Avstriya, Fransa, Türkiyə, Kipr, Rusiya və başqa ölkələrin universitetlərində əsas dərs vəsaiti kimi istifadə olunur.
Dünyanın elm nəhəngləri tərəfindən çox yüksək qiymətləndirilən, dünya elminə nəzəriyyələr verən, informatika və qeyri-səlis məntiq sahəsində məşhur alim, paylanmış intellektual sistemlər üzrə yeni konsepsiyanın və istiqamətin müəllifi, qeyri-səlis neyron şəbəkəsi əsasında intellektual robotların yaradıcısı, hibrid intellektual sistemlər nəzəriyyəsinin yaradılması və inkişafının əsasını qoyan, idarəetmə sahəsində nüfuzlu elmi məktəb yaradan Rafiq Əliyev ABŞ-ın Corciya Dövlət, Almaniyanın Zigen, Şimali Kiprin Yaxın Doğu, İranın Təbriz universitetlərinin professorudur.
″Qeyri-səlis sistemlərin tətbiqi″, ″Sənaye intellektual sistemləri″, ″Sistem təhlilində, qərar qəbuletmə və idarəetmədə sözlə hesablama və Soft Computing″ üzrə beynəlxalq elmi konfranslar hər iki ildən bir dünyanın müxtəlif ölkələrində Rafiq Əliyevin bilavasitə rəhbərliyi və iştirakı ilə keçirilir.
Ümid Partiyasının sədri İqbal Ağazadə və partiyanın Rəyasət Heyəti Rafiq bəy Əliyevi təbrik edir, ona uzun ömür, can sağlığı, elmi fəaliyyətində uğurlar diləyir.
Təbrik edirik!
Şərh yaz
